【 #JARvelogue周遊學・必學！睇包裝分飲品果汁成份 】
好多人鍾意飲日本飲品，不論去日本旅行逛便利店、定係喺香港行日本超市都好，都會買嚟飲！日本飲品超多種類，包裝又靚，有時仲會比個包裝呃咗添！所以今次想同大家分享嘅冷知識，就係同飲品包裝有關喇！原來睇日本果汁嘅包裝，係睇到飲品嘅玄機㗎！
JARvel-knowledge ⬇️
⭐️⭐️喺日本，其實只有100％純果汁，包裝先至可以用見到果肉嘅相㗎！⭐️⭐️
日本有法例規定，只係100％純果汁嘅飲品，先可以喺包裝上用切開見到果肉嘅生果相(即係切開見到橙肉嘅橙等等) 。果汁唔夠100％，範圍喺100％以下～5％以上嘅果汁，包裝上唔可以有切開見果肉嘅相，但就可以出現生果嘅相片 (即係成個生果樣) ，咁少過5％呢？冇錯！就係連相都唔用得，只可以用生果嘅畫/ 圖像表達。
呢個規定係方便大家一眼睇到邊隻果汁係100％純果汁、邊隻少過100％、邊隻5％以下。可能你會問，如果隻果汁係100％但佢又唔想用切開嘅生果做包裝，咁咪分唔清囉？但試諗下，如果你明明係100％，明明可以係包裝上就話到俾人知你係純果汁，咁點解唔用切開嘅生果呢? (當然為免真係有咁「另類」嘅生產商，拎去背面睇吓成份表先買都好嘅...) 另外，法例仲規定果汁比例5％以下嘅飲品，要寫明係「果汁 XX％」，或者「無果汁」、表明果汁比例。
下次買日本飲品嗰陣，又多樣嘢可以留意吓喇。希望之後可以試到多啲新奇又好飲嘅野飲，到時可以介紹俾大家！或者大家又有冇咩心水日本飲品喺度分享吓呢？
#JARvelogue
#日本冷知識
#相入面嘅係100%日本蜜柑
#都係嗰句啦無飲品相所以搵呢張頂住先
#想睇Ref相可以自己上網關鍵字搵果汁100%睇
#不過老實講句
#通常果汁100%嗰啲都會勁大隻字寫出嚟
#唔睇相都睇到啦
#同埋邊個會飲果汁5%以下嘅果汁
#真心問
#果汁茶同其他果汁汽水另計
Search